दोहा – बहराइनबाट विद्युतीय राहदानीको सेवा सुरु गरिएको छ । बहराइनस्थित नेपाली दूतावासले पनि विद्युतीय राहदानी जारी गर्ने कार्य सफलतापूर्वक परीक्षण गरिएको जनाएको छ ।

दूतावासले एक सूचना जारी गर्दै विद्युतीय राहदानीको लाइभ इनोल्मेन्ट सुरु गरिएको जनाएको छ । यन्त्रवाचक राहदानीको अवधि सकिएर नवीकरणका लागि दूतावासमा पुगेकी शर्मिला लिम्बुको आइतबार लाइभ इनोल्मेन्टबाट सेवा सुरु गरिएको हो ।

दूतावासका अनुसार उनी पश्चात श्रीराम खत्रीको समेत आइतबारै लाइभ इन्रोल्मेन्ट भएको छ। लाइभ इनोल्मेन्ट जारी रहेको समयमा राहदानी विभागका महानिर्देशक डोरनाथ अर्यालले भर्चुअल माध्यमबाट लाइभ इनोल्मेन्टको सेवा सुरु गरेको दूतावासले जनाएको छ ।

महानिर्देशक अर्यालले सेवाग्राही लिम्बुलाई बधाई ज्ञापन गर्दै उपकरणहरु पुग्नासाथ विद्युतीय राहदानी तदारुकताका साथ जारी गर्न सफल भएकोमा दूतावासका कार्यवाहक राजदूत अरूणा घिसिङ, श्रम सहचारी दामोदर दाहाल, सहचारी सुनिता लकान्द्री तथा दूतावासका कर्मचारीहरूमा धन्यवाद ज्ञापन गरेका थिए । महानिर्देशक अर्यालले दूतावासबाट अब विद्युतीय राहदानी मात्र जारी हुने बताए ।

यसैगरी उपकरणहरु बहराइन पठाउनुका साथै आवश्यक उपकरण सञ्चालन गर्न सहजीकरणको भूमिका खेल्न महानिर्देशक अर्याल, राहदानी विभागका सबै कर्मचारीलाई कार्यवाहक राजदूत घिसिङले धन्यवाद ज्ञापन गरेकी थिइन् ।