काठमाडौँ– लण्डनबाट फिल्म शिक्षामा मास्टर्स गरेका रोहित करण वैद्यले नेपाली फिल्म निर्देशनमा डेब्यु गर्ने भएका छन् । लण्डनको  ‘नेशनल फिल्म एण्ड टेलिभिजन स्कुल’ बाट फिल्म निर्देशन र टेलिभिजन मनोरञ्जन कार्यक्रम निर्माणमा मास्टर गरेका वैद्यले फिल्म  ‘मायाको माया’ बाट नेपाली फिल्म निर्देशनमा डेब्यु गर्न लागेका हुन् ।

उनले सन् २०१७ मा आफ्नो पहिलो प्रोजेक्ट  ‘लाइफ अन रोड नेपाल’ निर्माण निर्देशन गरेका थिए । उक्त डकुड्रामा ग्रीसको ‘लेरापत्र अवार्ड्स सेरेमोनी’, सिंगापुरको ‘इन्डिपेन्डेन्ट फिल्म फेस्टिभल’ र ‘इन्डीफिल्म फेस्ट’ क्यालिफोर्नियामा प्रदर्शन भएको थियो । क्यालिफोर्नियामा रोहितले उक्त फिल्मबाट अवार्ड समेत जितेका थिए ।

फिल्म लेखन र निर्देशनको भोक बोकेर नेपाली रजतपटमा पाइला राख्दै गरेका रोहितले फिल्म शिक्षा र अन्तर्राष्ट्रिय फिल्म उद्योगबाट प्राप्त अनुभवले नेपाली पन बोकेको फिल्म दर्शक माझ ल्याउन आतुर छन् । त्यसो त नेपालमा पछिल्लो समय धेरै मन पराइने जनरा फेमिली ड्रामा, लभस्टोरी र कमेडी नै हो भने समीक्षक र दर्शक दुबैबाट आलोचना खेप्ने फिल्म पनि यही जनराका हुन् ।

पहिलो प्रोजेक्टमा नै प्रेम मिसाएर फेमिली ड्रामा उठाउँदै गरेका उनले नेपाली दर्शकलाई पहिलो स्वाद कस्तो दिनेछन् त्यसको लागि फिल्म निर्माण सम्पन्न भएर हलसम्म आउने समय पर्खिनैपर्छ ।