काठमाडौं- अमेरिकी राष्ट्रपति जो बाइडेनले युक्रेनमाथि रुसी हमला मस्कोका लागि  ‘रणनीतिक रुपमा विफल’ भएको टिप्पणी गरेका छन् । युरोप भ्रमणका क्रममा युक्रेनको छिमेकी देश पोल्याण्डको राजधानी वार्सामा सम्बोधन गर्दै बाइडेनले रुसी राष्ट्रपति भ्लादिमिर पुटिन शक्तिमा टिक्न नसक्ने समेत बताएका छन् ।

युक्रेनलाई समर्थन गर्न विश्वका प्रजातन्त्रहरूलाई एकजुट हुन आह्वान गर्दै राष्ट्रपति बाइडेनले पुटिनप्रति संकेत गर्दै भने, ‘ईश्वरका लागि यो मान्छे शक्तिमा रहन सक्दैन ।’

यता राष्ट्रपति बाइडेनको टिप्पणीलाई लिएर रुसी प्रशासन क्रेमलिनले निन्दा गरेको छ । आफ्ना राष्ट्रपति छान्ने अधिकार आफूहरूलाई मात्र बताएको क्रेमलिनले जनाएको छ । राष्ट्रपति बाइडेनको भनाइको विरोध गर्दै क्रेमलिनले अमेरिकाका बारेमा टिप्पणी गर्ने अधिकार नभएको प्रतिक्रिया दिएको छ ।

‘त्यसबारे निर्णय गर्ने अधिकार बाइडेनलाई छैन । रुसका राष्ट्रपतिलाई रुसी जनताले निर्वाचित गर्छन्’ क्रेमलिन प्रवक्ता दिमित्री पेस्कोभले रोयटर्ससँग भने ।

रुसको प्रतिक्रियापछि अमेरिकी राष्ट्रपतिको कार्यालय ह्वाइटहाउसका एक अधिकारीले राष्ट्रपति बाइडेनले रुसमा शासन परिवर्तनका लागि आह्वान नगरेको तर त्यसको अर्थ  ‘पुटिनलाई आफ्ना  छिमेकी वा क्षेत्रमा शक्ति प्रयोगका लागि अनुमति दिन नसकिने’ रहेको बताए ।