काठमाडौं- रुसी विदेश मन्त्री सर्गेई लाभरोभले तेश्रो विश्वयुद्धको चेतावनी दिएका छन् । रुसी समाचार संस्था इन्टरफ्याक्सका पत्रकारहरूसँग कुरा गर्दै लभ्रोभले तेश्रो विश्वयुद्धको चेतावनी दिएको कतारी टेलिभिजन च्यानल अल जजीराको अनलाइन संस्करणले जनाएको छ ।

उनले युक्रेनले शान्ति वार्ताको पालना नगरेमा तेस्रो विश्वयुद्धको सम्भावना रहेको चेतावनी दिएका हुन् । लाभरोभले शान्ति वार्तामा युक्रेनको दृष्टिकोणको आलोचना गरेको मस्को टाइम्सले जनाएको छ ।

उनले भने– ‘सद्भावनाको सीमा हुन्छ । तर यदि यो पारस्परिक छैन भने यसले वार्ता प्रक्रियालाई मद्दत गर्दैन ।’

लाभरोभले टर्कीको इस्तानबुलमा रुस र युक्रेनबीच भएको बैठकमा युक्रेनी पक्षले अघिल्लो अडानबाट पछि हटेर सम्झौताको मस्यौदा प्रस्तुत गरेको उल्लेख गरेका छन् ।

यसबाहेक लाभरोभले रुसले युक्रेनका राष्ट्रपति भोलोदिमिर जेलेन्स्कीले तोकेको टोलीसँग वार्तामा संलग्न हुने कुरामा जोड दिएका छन् । तर लाभ्रोभले भने जेलेन्स्कीले शान्तिवार्ताको नाटक मञ्चन गरिरहेको आरोप लगाएका छन् ।

लाभरोभले तेस्रो विश्वयुद्धको खतरा बाहिर सुनिए जत्तिकै वास्तविक रहेको समेत चेतावनी दिएका छन् । ‘खतरा गम्भीर छ, यो वास्तविक हो ।’ उनले भने ।