काठमाडौं– अमेरिकी विदेशमन्त्री एन्टोनी ब्लिन्कनले रुसले युक्रेनका केही भागमा क्रूरता देखाएको तर आफ्नो युद्धको उद्देश्यमा असफल भएको बताएका छन् । युक्रेन भ्रमणका क्रममा विदेशमन्त्री ब्लिन्कनले सो धारणा राखेको बीबीसीले जनाएको छ ।

उनले आइतबार किभमा राष्ट्रपति जेलेन्स्कीसँगको भेट गरेका थिए । विदेशमन्त्रीसँगै अमेरिकी रक्षामन्त्री लोयड अस्टिन पनि युक्रेन भ्रमणमा पुगेका थिए ।

युक्रेनले रुसी हमलाको प्रतिकार गर्न अमेरिकासँग सैन्य हतियार माग गरिरहेका बेला दुई अमेरिकी उच्च अधिकारी आइतबार युक्रेनको राजधानी किभ पुगेका हुन् । 

पछिल्लो समयमा रुसले आफ्नो आक्रमण पूर्वी युक्रेनमा केन्द्रित गरेको छ । यसअघि रुसले युक्रेन युद्ध दोस्रो चरणमा प्रवेश गरेको बताएको थियो । रुसको आक्रमण सुरु भएपछि यो उच्चस्तरीय अमेरिकी भ्रमण हो ।