काठमाडौं– गत साता रुसले नाट्यशालामा गरेको हमलामा ३ सय जनाको मृत्यु भएको युक्रेनी अधिकारीले जनाएका छन् । गत मार्च १६ मा रुसले दक्षिणी शहर मारिउपोलमा रहेको नाट्यशालामा हमला गरेको थियो ।

युद्धबाट जोगिन मानिसहरु शरण लिइरहेका बेला नाट्यशालामा हमला गरिएको युक्रेनी अधिकारीले बताउँदै आएका छन् । घेराबन्दीमा परेको मारिउपोल शहरका अधिकारीले यस्तो हताहतिको विवरण दिएका हुन् ।

‘प्रत्यक्षदर्शीले दिएको विवरणअनुसार रुसी लडाकु विमानमार्फत् मारिउपोलको नाट्यशालामा गराइएको बम आक्रमणमा ३ सय जनाको मृत्यु भएको छ ।’ मारिउपोलको नगरपरिषद्ले विज्ञप्तिमार्फत् जानकारी दिएको छ ।

‘अन्तिम समयसम्म कसैले पनि यो भयानक घटनाको विश्वास गर्न मान्दैन ।’ विज्ञप्तिमा भनिएको छ, तर आक्रमणका बेला नाट्यशालाको भवनभित्र रहेका मानिसहरुको बयानले हताहती पुष्टि गरेको नगर परिषद्को दाबी छ ।

यदि पुष्टि भएको खण्डमा एक महिना लामो रुसी आक्रमणका क्रममा एकै पटकमा यो सबैभन्दा ठूलो मानवीय क्षति भएको घटना हुने अन्तर्राष्ट्रिय सञ्चारमाध्यमले जनाएका छन् ।