काठमाडौं– एकदिवसीय क्रिकेट सिरिजको दोस्रो खेलअन्तर्गत नेपालले पपुवा न्यु गिनी पीएनजीलाई २ सय ७९ रनको लक्ष्य दिएको छ ।

काठमाडौंको कीर्तिपुरस्थित त्रिवि अन्तर्राष्ट्रिय क्रिकेट मैदानमा टस जितेर ब्याटिङ रोजेको नेपालले निर्धारित ओभरमा ८ विकेट गुमाएर २ सय ७८ रन बनायो ।

नेपालका लागि दीपेन्द्र सिंह ऐरीले १ सय ५, देव खनालले ७२, रोहित पौडेलले ३५, भीम शार्की २६ र कप्तान सन्दीप लामिछानेले नटआउट २४ रन जोडे ।

यस्तै, अनिल शाहको १, आरिफ शेखले ४, सोम्पाल कमीले नटआउट ३ र अनिल शाहले १ रन जोडे । कुशल भूर्तेल र पवन शरफ भने शून्य रनमा आउट भए ।

दीपेन्द्रले १ सय ४० बलमा ७ चौंका सहित १ सय ५ रनको योगदान गरे । यो नेपालको लागि दीपेन्द्रको पहिलो शतक हो ।

यससँगै एक दिवसीय सिरिजमा नेपालका लागि अन्तर्राष्ट्रिय शतक पुरा गर्ने दीपेन्द्र तेस्रो क्रिकेटर बनेका छन् ।

देवले ८६ बलमा ३ छक्का र ४ चौंका प्रहार गर्दैँ ७२ रनको योगदान गरे । नेपालको लागि देवको यो पहिलो अर्धशतक हो ।