काठमाडौँ- दक्षिण अमेरिकी मुलुक भेनेजुएलाको पश्चिमी भागमा भारी वर्षाका कारण आएको बाढीले धार्मिक जमघटमा सहभागीहरुको एक समूहलाई बगाउँदा कम्तीमा सात जनाको मृत्यु भएको छ । मुलुकको ताचिरा राज्यमा घटना भएको भेनेजुएलाका गभर्नरले बताएका छन् ।

प्रोटेस्टेन्ट धार्मिक सम्प्रदाय मेथोडिस्ट चर्चका करिब ४० जना सदस्य भेला भएका बेला भारी वर्षाका कारण अचानक बाढी आएको गभर्नर फ्रेडी बर्नालले ट्वीटरमार्फत जानकारी दिएका छन् ।

वर्षा कम भएपछि नदीमा नुहाउने क्रममा एक्कासी पानीको सतह बढेर आएको र उनीहरुलाई बगाएको बर्नालले बताए ।

उनले भने, ’अहिलेसम्म सात वटा शव निकालिएको छ, जसमध्ये चार जनाको पहिचान हुन सकेको छैन, हामीले पहिचान हुन नसकेका शवका अफन्तको खोजी जारी राखेका छौं ।

कोलम्बियाको सिमानामा पर्ने पर्यटकहरूको लागि लोकप्रिय एन्डीज पर्वतमालाको क्षेत्रमा बाढी आएको हो । यस वर्ष भेनेजुएलामा औसतभन्दा बढी वर्षा भएको छ । वर्षााका कारण धेरै क्षेत्रमा क्षति पुगेको अधिकारीहरूले बताएका छन् ।

सरकारका प्रवक्ताले भारी वर्षालाई ‘ला नीना’ नामक मौसमी घटनासँग सम्बन्धित रहेको जनाएका छन् । प्रशान्त महासागरको भूमध्यरेखीय सतहको पानीमा तापक्रमको उतारचढावका कारण यस्तो हुने बताइन्छ ।