काठमाडौं – दुई महिना लामो उपचारपछि नेपाल फर्किएका नेकपा (माओवादी केन्द्र)का नेता वर्षमान पुन मंगलबार बिहानै अध्यक्ष पुष्पकमल दाहाल ‘प्रचण्ड’लाई भेट्न खुमलटार पुगेका छन् ।

नेता पुनका सहयोगी सन्तोष पुनका अनुसार मंगलबार बिहानै पत्नी पूर्वसभामुख ओनसरी घर्तीमगरसहित पुन खुमलटार पुगेका हुन् ।

सोमबार स्वदेश फर्किएपछि त्रिभुवन अन्तर्राष्ट्रिय विमानस्थलमा पुनले आफ्नो दाबी पार्टी महासचिवमा रहेको उल्लेख गरेका थिए ।

खुमलटार पुगेका नेता पुनलाई अध्यक्ष प्रचण्डले निवासमा स्वागत गर्दै पूर्ण स्वास्थ्य लाभको कामना गरेका छन्।

भर्खरै सम्पन्न माओवादी केन्द्रको आठौं महाधिवेशनले अध्यक्ष र केन्द्रीय समिति चयन गरे पनि पदाधिकारी चयन गर्न सकेको छैन ।

माओवादीभित्र अध्यक्षपछि कार्यकारी मानिएको महासचिव पदमा जनार्दन शर्मासँगै नेता पुनले दाबी गरेका छन् । माओवादीमा अहिलेसम्म पदाधिकारी चयन नहुनु र नेता पुन स्वदेश फर्किए लगत्तै महासचिवको दाबेदारी सार्वजनिक गर्नुलाई महत्वका साथ हेरिएको छ ।