काठमाडौँ– क्यानाडाको टोरन्टो सहरमा रहेको एक हिन्दू मन्दिरमा तोडफोड गरिएको छ । टोरन्टोमा रहेको स्वामीनारायण हिन्दू मन्दिरमा अज्ञात व्यक्तिहरुले तोडफोड गरेको भारतीय सञ्चारमाध्यमले जनाएका छन् ।

भारतीय अनलाइन इकोनोमिक टाइम्सका अनुसार घटनामा संलग्नहरुले उक्त मन्दिरको पर्खालमा खलिस्तान पृथकतावाद समर्थित एवम् भारतविरोधी नारा लेखेका छन् ।

भारतले क्यानाडा सरकारसमक्ष हिन्दू मन्दिरमा भएको तोडफोड र भारतविरोधी एवम् खलिस्तान पृथकतावाद समर्थित नारा लेखिएकोबारे कडा विरोध गरेको छ ।

‘भारतविरोधी नारा लेखेर टोरन्टोमा रहेको स्वामीनारायण मन्दिर तोडफोड गर्ने कदमको हामी कडा निन्दा गर्दछौँ ।’ क्यानाडास्थित भारतीय दूतावासले सामाजिक सञ्जालमा लेखेको छ, ‘हामीले क्यानाडाका अधिकारी समक्ष घटनाबारे अनुसन्धान गरी घटनामा संलग्नहरुलाई तत्काल कारवाही गर्न आग्रह गरेका छौँ ।’

सामाजिक सञ्जालमा सार्वजनिक भिडियोमा उक्त मन्दिरको पर्खालमा खलिस्तान समर्थित नारा लेखेको देख्न सकिन्छ । क्यानाडाका केही नेताहरुले घटनाप्रति दुःख व्यक्त गरेको जनाइएको छ ।