काठमाडौँ- लेबनानबाट आप्रवासी लिएर आएको एउटा डुङ्गा सिरियाली जलक्षेत्रको समुद्रमा डुब्दा त्यसमा रहेका ६१ जनाको ज्यान गएको छ ।

दुर्घटनामा ६१ जनाको ज्यान गएको र अरु केही घाइते भएको लेबनान सरकारलाई उद्धृत गर्दै कतारी टेलिभिजन च्यानल अल जजीराले जनाएको छ ।

ज्यान जानेमा अधिकांश आप्रवासीहरु नै रहेको सिरियाली अधिकारीहरुले जानकारी दिएका छन् । लेबनानबाट आएको सो डुङ्गा सिरियाली जलक्षेत्रको समुद्रमा पुग्दा डुबेको र त्यसमा परेर अरु केही हराइरहेका सिरियाली स्वास्थ्य मन्त्रालयले जनाएको छ ।

डुबेको डुङ्गाबाट करिब २० जनालाई उद्धार गरिएको सिरियाली स्वास्थ्यमन्त्रालयले जानकारी दिएको छ । उद्धार गरिएका उनीहरुलाई अस्पताल भर्ना गरिएको छ ।

सिरियन अब्जरभेटरी फर ह्युमन राइट्सले उक्त डुङ्गामा एक सय २० देखि एक सय ५० जना जति आप्रवासी सवार रहेको र उक्त डुङ्गा साइप्रसका लागि हिँडेको बताएको छ ।

डुङ्गामा क्षमता भन्दा धेरै मानिसहरु चढेका कारण डुबेको हुन सक्ने प्रारम्भिक अनुमान गरिएको छ । तर उक्त डुङ्गा कहाँ जान लागेको हो भन्ने बारेमा थाहा नभएको उद्धार गरिएका आप्रवासीहरुले जनाएका छन् । सो डुङ्गामा लेबनान, सिरिया र अरु अज्ञात मुलुकका नागरिकहरु पनि रहेका बताइएको छ ।

त्यस डुङ्गामा परेर हराइरहेकाहरुको खोजी कार्य जारी रहेको छ । खोजीका लागि हेलिकोप्टर र स्थानीय माझीलाई प्रयोग गरिएको पनि समाचारमा जनाइएको छ ।