काठमाडौँ– कृष्ण सागरबाट युक्रेनी अन्न निर्यातलाई सहज पहुँच दिने विषयमा रुससँग सहमति जुटेको टर्कीले जनाएको छ ।

यसबारे शुक्रबार टर्कीको सबैभन्दा ठूलो सहर इस्तानबुलमा युक्रेन, रुस, टर्की र संयुक्त राष्ट्रसंघका महासचिव एन्टोनियो गुटरेजबीच हस्ताक्षर हुने बीबीसीले जनाएको छ ।

गत फेब्रुअरी २४ मा रुसले युक्रेनमाथि आक्रमण गरेसँगै विश्वभर अन्नको भाउ उच्च भएको छ । रुस र युक्रेन विश्व बजारमा अन्नको सबैभन्दा महत्वपूर्ण आपूर्तिकर्ता मुलुक रहेको बताइन्छ ।

रुसले युक्रेनी बन्दरगाहबाट अन्न एवम् अन्य अत्यावश्यक खाद्यसामग्री निर्यात गर्न बन्देज लगाइदिएको छ । यसबाट युक्रेनमा २ करोड टन अन्न युक्रेनमा नै सञ्चित भएको छ ।

यता अमेरिकाले भने संयुक्त राष्ट्रसंघको मध्यस्थतामा भएको उक्त सहमतिको स्वागत गरेको छ । अमेरिकी विदेश मन्त्रालयका प्रवक्ता नेड प्राइसले यस सहमतिको कार्यान्वयन भने चुनौतिपूर्ण रहेको टिप्पणी गरेका छन् ।

‘पहिलो कुरा त सुरुमा हामीले यस्तो अवस्था आउनै दिनु हुँदैनथ्यो । रुसी महासंघले जानाजान खानेकुरालाई हतियारका रुपमा प्रयोग गरिरहेको छ ।’ प्राइसलाई उद्धृत गर्दै बीबीसीले जनाएको छ ।