काठमाडौँ- जापानी प्रधानमन्त्रीको कार्यालयनजिकै एकजनाले आत्मदाहको प्रयास गरेका छन् । प्रधानमन्त्री फुमियो किशिदाको कार्यालय नजिकै आफूलाई आगो लगाएपछि एक व्यक्तिलाई बेहोस अवस्थामा अस्पताल लगिएको स्थानीय सञ्चारमाध्यमले जनाएका छन् ।

बुधबार टोकियोमा भएको घटनाको बारेमा प्रहरीले टिप्पणी गर्न अस्वीकार गरेको छ । टिभी असाहीका अनुसार आगो निभाउने प्रयास गर्ने क्रममा एक प्रहरी अधिकारी घाइते भएका छन् ।

ती व्यक्तिले आत्मदाह गर्न थालेपछि स्थानीयले प्रहरीलाई खबर गरेका थिए । आत्मदाहको प्रयास गर्ने व्यक्ति ७० वर्षको रहेको जनाइएको छ ।

ती व्यक्तिले केही महिनाअघि हत्या भएका पूर्वप्रधानमन्त्री शिन्जो आबेको राजकीय अन्त्येष्टि गर्ने योजनाको विरोध गरेको सो टेलिभिजन स्टेसनले जनाएको छ । थिए ।

घटनास्थल नजिकैबाट प्रहरीले ‘म कडा विरोध गर्दछु’ लेखेको पत्र फेला पारेको अन्तर्राष्ट्रिय समाचार संस्था रोयटर्सले जनाएको छ । बुधबार आबेको ६८ औँ जन्मदिन हो ।

जापानमा सबैभन्दा लामो समय सेवा गर्ने प्रधानमन्त्री आबेलाई जुलाई ८ मा चुनावी प्रचारका क्रममा गोली हानेर हत्या गरिएको थियो । उनको राजकीय अन्तेष्टि सेप्टेम्बर २७ मा हुँदै छ ।