काठमाडौं– रुसी युद्धपोत मोस्कवामाथि युक्रेनले क्षेप्यास्त्र प्रहार गर्नु केही घण्टाअघि कृष्ण सागरमा अमेरिकी जासुसी विमानले गस्ती गरेको खुलासा भएको छ ।

बेलायतबाट प्रकाशित हुने टाइम्स अखबारको खुलासा अनुसार मोस्कवा युद्धपोतमाथि आक्रमण हुनुअघि अमेरिकी वायुसेनाको पी ८ पोसाइडन विमानले कृष्णसागरको गस्ती गरिरहेको थियो ।

गस्तीमा रहेको उक्त जासुसी विमान मोस्कवाबाट १ सय माइल नजिक सम्म पुगेको द टाइम्सले जनाएको छ ।

केही दिन अघि युक्रेनले प्रहार गरेको नेप्चुन क्षेप्यास्त्रबाट रुसी फौज अन्तर्गतको कृष्ण सागरीय नौसेनामा तैनाथ मोस्कवा युद्धपोत ध्वस्त भएको थियो । आक्रमणको भोलिपल्ट ‘क्षतिग्रस्त युद्धपोत’ कृष्ण सागरमा डुबेको रुसी रक्षा मन्त्रालयले पुष्टि गरेको थियो ।

रुसले आगलागीका कारण युद्धपोत डुबेको बताउँदै आएको छ । यद्यपि के कारणले आगलागी भएको भन्नेबारे रुसी पक्षले केही खुलाएको छैन ।