काठमाडौं– अमेरिकी राष्ट्रपति जो बाइडेनले भारतीय मूलकी शेफाली रज्दान दुग्गललाई नेदरल्याण्ड्सका लागि राजदूत नियुक्त गरेका छन् । यसअघि डेमोक्र्याटिक राष्ट्रिय समितिको आर्थिक उपप्रमुख रहिसकेकी शेफालीलाई नेदरल्याण्ड्सका लागि अमेरिकी राजदूत नियुक्त गरिएको ह्वाइट हाउसले जनाएको छ ।

दुई सन्तानकी आमा उनी अनुभवी राजनीतिक अभियन्ता, महिला अधिकारवादी एवम् मानव अधिकारका क्षेत्रमा पनि क्रियाशील रहेको ह्वाइट हाउसले जनाएको छ ।

यसबाहेक उनी मानव अधिकारवादी संगठन ह्युमन राइट्स वाचको सन फ्रान्सिस्को समिति सदस्य समेत रहेको बताइएको छ ।

उनी यसअघिका डेमोक्र्याट उम्मेदवारहरू बाराक ओबामा र हिलारी क्लिन्टनको राष्ट्रपतीय अभियानमा पनि सक्रिय थिइन् ।

फ्लोरिडाको मियामी विश्वविद्यालयमा आम सञ्चार विषयको अध्ययन गरेकी उनले न्यूयोर्क विश्वविद्यालयबाट राजनीतिक सञ्चार विषयमा स्नातकोत्तर गरेकी छिन् ।