बारा– बाराको कलैया उपमहानगरपालिका-२० बाट दुई जना भारतीय नागरिक लागूऔषधसहित पक्राउ परेका छन् । प्रहरी चौकी बसन्तपुरले गण्डक नहर चोकबाट शनिबार उनीहरूलाई पक्राउ गरेको हो । 

भरतको बिहारबाट नेपाल आएको बिआर ३० आर ९३९१ नम्बरको मोटरसाइकल चेकजाँच गर्ने क्रममा प्रहरीले भारत बिहार मोतिहारी जिल्ला महुअवा थाना ग्राम पञ्चायत कोरैया-१ का ३२ वर्षीय चन्दन मिश्रा र २ का २५ वर्षीय धर्मजित कुशवाहालाई पक्राउ गरेको छ । 

प्रहरीले उनीहरूको पिठ्युमा बोक्ने झोलाभित्र लुकाइछिपाइ नेपालमा बिक्रीका निम्ति ल्याएको डाइजेपाम, फेनारगन र  नुर्फिन ६ (६ सय थान र नाइट्राभेट-१० तीन सय थान लागूऔषधसहित पक्राउ गरेको जिल्ला प्रहरी कार्यालय बाराले जनाएको छ । 

लागूऔषध फेला परेपश्चात् उनीहरू सवार मोटरसाइकलसहित नियन्त्रणमा लिई थप अनुसन्धानका निम्ति जिल्ला प्रहरी कार्यालय बारा ल्याइएको छ । खुल्ला सीमाका कारण बारा लागूऔषध कारोबारीहरूका लागि मुख्य ट्रान्जिट बन्दै आएको छ ।