मुम्बई(एबीपी लाइभ)– सन् ९० को दशकमा मीना कुमारी बलिउडकी लोकप्रिय अभिनेत्री थिइन् । उनलाई बलिउडमा ‘ट्राजेडी क्वीन’को उपाधि नै दिइएको थियो । करिब ९० फिल्ममा अभिनय गरेकी मीनाले एकपछि अर्को फिल्म गर्दै आफूलाई मनपराउने फ्यान तथा फिल्मकर्मीको सूची नै बनाएकी थिइन् । उनको फ्यान फलोइङको कुरा गर्दा एक डाकू पनि उनको ठूलो फ्यान थिए । जसले आफ्नो हातमा चक्कूबाट अटोग्राफ लिएका थिए ।

यो किस्सा मीना कुमारी अभिनित फिल्म ‘पाकीजा’को समयको हो । फिल्मको टिम सुटिङका लागि मध्यप्रदेशबाट दिल्ली जाँदैथियो । तर शिवपुरी इलाकामा उनीहरुको कारको पेट्रोल सकियो र सबै युनिट त्यही रोकिनु पर्यो । सुनसान इलाका भएकाले सबैजना पेट्रोलको व्यवस्था नहुञ्जेलसम्म त्यही बस्ने निर्णय लिए ।

आधा रातमा डाकुहरुको समूह उनीहरुको गाडी छेऊमा आइपुग्यो । डाकूले फिल्मकर्मीसँग कुराकानी गर्दा गाडीमा मीना कुमारी पनि रहेको थाहा पाए । यो कुरा सुनेर ठाकुको सरदारको आँखा चम्किलो भयो र मीना कुमारीलाई भेटेर राती बस्ने व्यवस्था मिलाए । बिहान उठेर उनीहरुको गाडीमा पेट्रोल भराए र राम्रोसँग जानका लागि कामना पनि गरे ।

तर रोचक कुरा के भने मीना कुमारीलाई बिदाई गर्नुअघि सरदारले अटोग्राफ मागेका थिए । लेख्ने कुनै सामान नभेटेपछि सरदारले चक्कूमार्फत अटोग्राफ दिन आग्रह गरेपछि मीना कुमारीले डराई–डराई अटोग्राफ दिएकी थिइन् ।