दोहा – मलेसियामा लामो जेल सजाय काटेर १ सय ११ जना नेपाली स्वदेश फर्किएका छन्। साउनदेखि कात्तिक मसान्तसम्ममा मलेसियाका विभिन्न अध्यागमन सेन्टरमा रहेका १ सय ११ जना नेपाली नागरिकलाई उद्धार गरेर नेपाल फर्काइएको क्वालालम्पुरस्थित नेपाली दूतावासले जनाएको छ।

सबैजना विभिन्न तरिकाले मलेसियाको कानुन उलंघन गरेको आरोपमा मलेसियाको अध्यागमनले पक्राउ गरेको र जेल सजाय कटाएर त्यहाँको विभिन्न घरफिर्ती केन्द्रमा रहेका उनीहरुलाई कानुनी प्रक्रिया पूरा गरेर स्वदेश फर्काइएको हो।

दूतावासले उनीहरु सबैको यात्रा अनुमतिपत्र तयार गरेपछि स्वदेश फर्काउन सफल भएको जनाएको छ। मलेसिया पुगेपछि आफ्नो भिसा लागेको कम्पनी छाडेर अन्यत्र जाने, अवैध बसाई, व्यवहारजन्य समस्या लगायतक कारण नेपाली जेल पर्ने गरेका छन्।

त्यसैगरी सोही अवधिमा मलेसियामा अवैधानिक भएर अलपत्र भएका ५२ जना नेपाली नागरिक दूतावासको सहयोगमा अध्यागमन सम्बन्धी आवश्यक प्रक्रिया पूरा गरेर नेपाल फर्काइएको दूतावासले जनाएको छ।

कुनै पनि कानुनको उलङ्घन नगर्न र कुनै करणबस त्यस्तो भएको खण्डमा दूतावासले सहयोग गर्ने तथा गर्दै आएको जनाएको छ। मलेसिया कानुनी तथा गैरकानुनी गरेर तीन लाख ५० हजार हाराहारीमा नेपाली कार्यरत रहेको पाइन्छ।