काठमाडौँ– रुसले आफ्नो मुलुकमा गाभिएको दाबी गरेका चार युक्रेनी क्षेत्रमा रुसी राष्ट्रपति भ्लादिमिर पुटिनले सैन्य कानून लागू गरेको घोषणा गरेका छन् । रुसले केही समयअघि ‘जनमत सङ्ग्रह’ को आयोजना गरी आफ्नो मुलुकमा गाभेका युक्रेनका चार क्षेत्रमा पुटिनले सैन्य कानून लागू गरेको घोषणा गरेका हुन् ।

रुसको राष्ट्रिय सुरक्षा परिषद्लाई राष्ट्रपति पुटिनले युक्रेनका लुहान्स्क, डोनेत्स्क, जापोरिज्जिया र खेर्सन क्षेत्रमा सैन्य कानून लागू गरेको जानकारी गराएको अन्तर्राष्ट्रिय समाचार संस्था रोयटर्सले जनाएको छ ।

पुटिनको घोषणाबाट रुसले ती क्षेत्रमा आफ्नो नियन्त्रणलाई सुदृढ गराउने उद्देश्य लिएको भएपनि सैन्य कानून लागू गर्ने घोषणाले ती क्षेत्रमा कस्तो सैन्य वा नीतिगत परिवर्तन हुने भन्ने अझै स्पष्ट नभएको जनाइएको छ ।

यसअघि रुसी सञ्चारमाध्यमले खेर्सन सहरबाट मानिसहरु बाहिरिएको समाचार सार्वजनिक गरेको थियो । तत्काल युक्रेनी आक्रमणको सम्भावनाबीच मानिसहरुलाई खेर्सन क्षेत्रबाट बाहिर निकालिएको रुसी पक्षको भनाइ छ ।

आगामी ६ दिनभित्रमा ५० देखि ६० हजार मानिसहरुलाई खेर्सन क्षेत्रबाट बाहिर निकालिने योजना रहेको खेर्सन क्षेत्रमा रुसले नियुक्त गरेका प्रशासकीय प्रमुख किरिल स्टेर्मौसोभलाई उद्धृत गर्दै रोयटर्सले जनाएको छ ।

यता युक्रेनी पक्षले भने रुसले खेर्सनबाट मानिसहरुलाई विस्थापित गरी ‘प्रोपागाण्डा’ गरेको आरोप लगाएको छ । युक्रेनी राष्ट्रपति कार्यालयका अधिकारी आन्द्रेई येर्माकले रुसले खेर्सनमा युक्रेनी सेनाले गोलाबारी गरेको भनी झूठो प्रचार गरेको आरोप लगाएको रोयटर्सले जनाएको छ ।