काठमाडौं– रुसी राष्ट्रपति भ्लादिमिर पुटिनले पश्चिमा मुलुकले रुसविरुद्ध लगाएका प्रतिबन्धहरू असफल भएको टिप्पणी गरेका छन् । मुलुकका शीर्ष अर्थ अधिकारीहरुसँगको छलफलका क्रममा पुटिनले यस्तो टिप्पणी गरेका हुन् ।

पुटिनले पश्चिमा मुलुकले ‘वित्तीय–आर्थिक अवस्थालाई तुरुन्तै बिगार्ने, बजारमा आतंक मच्चाउने, बैंकिङ प्रणाली ध्वस्त पार्ने जस्ता अवस्थाको अपेक्षा गरेको’ टिप्पणी गरे । उनले पश्चिमा मुलुकले अवलम्बन गरेको ‘आर्थिक ब्लित्ज’ को रणनीति असफल भएको समेत बताए ।

दोश्रो विश्वयुद्धका बेला नाजी जर्मनीले अवलम्बन गरेको सैनिक रणनीतिलाई पश्चिमी विश्वमा ‘ब्लित्ज’ को संज्ञा दिइन्छ ।

उनले रुसमाथि लगाइएका प्रतिबन्धले ‘पश्चिमा मुलुककै अर्थतन्त्र धराशायी भएको समेत टिप्पणी गरेको कतारी टेलिभिजन च्यानल अल जजीराको अनलाइन संस्करणले जनाएको छ ।

गत फेब्रुअरी २४ मा युक्रेनमाथि आक्रमण थालेपछि पश्चिमा मुलुकहरुले रुसी आर्थिक प्रणालीलाई लक्षित गरी विशाल स्तरमा प्रतिबन्धहरुको घोषणा गरेका छन् ।