काठमाडौँ – नेपाली कांग्रेसका नेता प्रकाशमान सिंहले आम मतदाताले संसद् विघटन गर्नेलाई नभई कांग्रेसलाई मत दिने दाबी गरेका छन्।

पिता गणेशमान सिंहको २५औं स्मृति दिवसका अवसरमा आज शोभा भगवतीमा आयोजित कार्यक्रममा उनले आसन्न निर्वाचनबाट नेपाली कांग्रेसले नै ‘म्यान्डेट’ पाउने दाबी गरे।

संविधानको सफल कार्यान्वयनका लागि मंसिर ४ को निर्वाचनमा कांग्रेस नेतृत्वको गठबन्धनको जित आवश्यक रहेको सिंहले बताएका छन्। सत्ता गठबन्धनमा अहिले सिट बाँडफाँडबारे भइरहेकाले छलफलले छिट्टै निकास पाउने उनको भनाइ छ। ‘गठबन्धनमा रहेका सबै दललाई चित्त बुझाउने गरी सिट बाँडफाँट हुन्छ’, उनले भने, ‘सबैलाई चित्त बुझाएर अघि बढ्ने हो।’

गणेशमान सिंह फाउन्डेसनले आयोजना गरेको कार्यक्रममा नेता सिंहले नेपाली राजनीतिमा गणेशमान सिंहको योगदानको चर्चा गरे। गणेशमान सिंहले देखाएको बाटो हिँड्न सके मात्र लोकतन्त्र बलियो हुने उनले सुनाए।