काठमाडौं–रियालिटी शो ‘द भ्वाइस अफ नेपाल’का प्रथम विजेता तथा गायक, संगीतकार सिडी विजय अधिकारीको स्वरमा रहेको नयाँ गीत ‘तिमीसँग छुट्टिएर’को भिडियो सार्वजनिक भएको छ । गीतको भिडियो सम्राट क्रियसन युट्युव च्यानलबाट रिलिज गरिएको हो ।

गीतमा कल्पना पाठकको शब्द र गायक सिडीकै संगीत तथा राजु कार्कीको संगीत संयोजन छ । वियोगान्त भावको गीतको भिडियो अमेरिकामा छायांकन गरिएको हो ।

आधा दशकदेखि अमेरिका बस्दै आएका निर्देशक सुमन दाहालले अमेरिकाको ल्याक्सिनटन क्षेत्रमा भिडियो छायांकन गरेका हुन् ।

भिडियोमा राजु भण्डारी र निश्मा चापागाईं फिचर्ड छन् । प्रेममा निश्माले धोका दिएपछि राजु एकल हुुनुको पीडालाई भिडियोमा देखाइएको छ ।

भिडियोमा अक्की शर्माको सम्पादन र छायांकन, भुपेन्द्र अधिकारीकाे भिडियाे मिक्सिङ तथा रेनिस फागोको रंग संयोजन छ ।