काठमाडौँ- युरोपेली मुलुक ग्रिसमा मालवाहक विमान दुर्घटनामा परेको छ । उत्तरी ग्रीसको काभाला सहर नजिकै एउटा कार्गो विमान दुर्घटनाग्रस्त भएको स्थानीय अधिकारीहरूले बताएका हुन् ।

युक्रेनमा रहेको एउटा कम्पनीद्वारा सञ्चालित एन्टोनोभ एएन–१२ विमान सर्बियाबाट बंगलादेशका लागि उडेको अन्तर्राष्ट्रिय समाचार संस्था रोयटर्सले जनाएको छ ।

उक्त विमानमा रक्षासम्बन्धी उपकरण एवम् गोलावारुद रहेको बताइएको छ । दुर्घटनापछि विमानमा आगो लागेको बताइएको छ ।

ग्रिक अधिकारीले उक्त विमानमा आठ जना सवार रहेको बताएका छन् । युक्रेनी अधिकारीहरुले भने उक्त विमानमा सवार सबै युक्रेनी नागरिक रहेको जानकारी दिएको रोयटर्सले उल्लेख गरेको छ ।

रोयटर्सले उक्त विमानमा साढे ११ टन कार्गो बोकेको र यसलाई सम्भावित खतरनाक भएको जनाएको छ । दुर्घटनाबारे प्रहरीले अनुसन्धान सुरु गरेका छन् ।