काठमाडौं- उत्तर कोरियामा ‘ज्वरो’ बाट पीडित व्यक्तिहरूको संख्या १४ लाख ८० हजार पुगेको छ । उत्तर कोरियाको आधिकारिक समाचार संस्था केसीएनएले जनाएअनुसार त्यहाँ सोमबार मात्रै २ लाख ६९ हजार नयाँ बिरामी फेला परेका छन् ।

केसीएनएका अनुसार तीमध्ये १ लाख ७० हजार ४६० जना निको भएका छन् भने छ जनाको मृत्यु भएको छ । 

अप्रिलको अन्त्यमा देशमा ‘ज्वरो’ को प्रकोप देखिएपछि अहिलेसम्म ८ लाख १९ हजारभन्दा बढी ज्वरो आएका व्यक्ति निको भइसकेको जनाइएको छ । अरु ६ लाख ६३ हजार ९०० भन्दा बढी उपचाररत छन् ।

त्यस्तै मृत्यु हुनेको संख्या ५६ पुगेको छ ।

मङ्गलबारको अर्को समाचारमा केसिएनएले औषधिको आपूर्ति सुनिश्चित गर्न तत्काल कदम चालिएको र जनसेनाको सैन्य मेडिकल फोर्स सोमबार प्योङयाङका सबै फार्मेसीहरूमा तैनाथ गरिएको जनाएको छ ।

यसका साथै केसीएनएले २४ घण्टे सेवा प्रणाली अन्तर्गत औषधि आपूर्ति गर्न थालेको समेत बताएको छ ।

केन्द्रीय आपतकालीन महामारी रोकथाम निकायले यो रोगबाट निको भएका व्यक्तिहरूमा पुनः सङ्क्रमण हुन नदिन महामारीको फैलावट रोक्न र सङ्क्रमणको नियन्त्रण प्रयास गरेको जनाएको छ ।

साथै देशभरका औषधि कारखाना र चिकित्सा उपकरण कारखानाहरूले अत्यावश्यक आवश्यकतामा औषधि र स्वास्थ्य सामग्रीको उत्पादन बढाएका छन् ।

प्योङयाङले गत साताको बिहीबार आफ्नो मुलुकमा पहिलो पटक कोरोना भाइरस संक्रमणको पुष्टि गर्दै देशव्यापी लकडाउन घोषणा गरेको छ ।