काठमाडौं – लामो बहसपछि संसदमा अमेरिकी सहयोग सम्बन्धी परियोजना मिलिनियम च्यालेन्ज कम्प्याक्ट (एमसीसी) अनुमोदनका लागि पेश हुने भएको छ ।

बुधबार दिउँसो १ बजे बस्ने प्रतिनिधिसभा बैठकमा सरकारको तर्फबाट एमसीसी टेबुल हुने निश्चित भएपछि सत्ता गठबन्धन र प्रतिपक्षी दल आआफ्नो रणनीति तय गर्न छलफलमा व्यस्त छन् ।

नेपाली काँग्रेसको मंगलबार बसेको केन्द्रीय कार्यसम्पादन समिति बैठकले एमसीसी अनुमोदन गर्ने निर्णय गरिसकेको छ । दिउँसो साढे ११ बजे बस्ने कार्यव्यवस्था समिति बैठकमा एमसीसीलाई संसद बैठकको कार्यसूची बनाउने विषयमा छलफल हुँदैछ । सभामुख अग्निप्रसाद सापकोटाले यसअघि नै दलहरुले निर्णय गरेर ल्याए एमसीसी नरोक्ने प्रतिवद्धता जनाइसकेका छन् ।

यसअघि मंगलबार सार्वजनिक भएको कार्यसूचीमा एमसीसी नपरे पनि कार्यव्यवस्था समिति बैठकले यसको टुंगो लगाउने छ । बुधबारको प्रतिनिधिसभा बैठकमा सरकारका तर्फबाट सूचना प्रविधि तथा सञ्चारमन्त्री ज्ञानेन्द्रबहादुर कार्कीले एमसीसी अनुमोदनका लागि पेस गर्ने तयारी गरेका छन् ।

सत्ताको नेतृत्वकर्ता काँग्रेसले एमसीसी पेस गर्ने तयारी गरेपछि सत्ता गठबन्धनका नेकपा (माओवादी केन्द्र), नेकपा (एकीकृत समाजवादी) र प्रमुख प्रपितपक्षी दल एमाले आन्तरिक छलफलमा जुटेका हुन् ।

प्रमुख दलले प्रतिनिधिसभा बैठक अघि पार्टी संसदीय दलको बैठक बोलाएका छन् । लामो समय बहस भइसकेकाले सरकार एमसीसी पारित गर्ने तयारीका साथ अगाडि बढेको छ । त्यसमा सत्ता गठबन्धनमा सहभागी दल र प्रतिपक्षी दलले साथ दिने काँग्रेसको विश्वास छ ।

एमसीसी संसदमा पेश गर्ने विषयमा सत्ता गठबन्धनको माओवादी केन्द्रका अध्यक्ष पुष्पकमल दाहाल ‘प्रचण्ड’ र समाजवादीका अध्यक्ष माधवकुमार नेपालसँग प्रधानमन्त्री शेरबहादुर देउवाले छलफल गरिसकेका छन् ।

सरकारले एमसीसी पेश गर्दा सत्तारुढ दलका नेता प्रचण्ड र नेपालले मौन समर्थन गर्ने रणनीति बालुवाटार बैठकले तय गरिसकेको छ । एमालेले भने यसअघि नै एमसीसी संसदमा पेश भएपछि त्यही धारणा राख्ने बताइसकेको छ ।