काठमाडौं– रुसले युक्रेनमाथि आक्रमण थालेको ५० दिन पूरा भएको छ । यसबारे सन्देश जारी गर्दै युक्रेनी राष्ट्रपति भोलोदिमिर जेलेन्स्कीले ५० दिनसम्म रुसी आक्रमणबाट रक्षा गर्नु उपलब्धि भएको टिप्पणी गरेका छन् ।

बीबीसीका अनुसार आक्रमणका बेला रुसले ५ दिनको समय दिएकोमा ५० दिनसम्म मुलुकको रक्षा गर्नु उपलब्धि भएको उनको टिप्पणी छ ।

‘तर उनीहरुलाई युक्रेनीहरु यतिसम्म बहादुर छन् भन्ने थाहा थिएन… ।’ सन्देशमा जेलेन्स्कीले भने, ‘…स्वतन्त्रता र आफ्नो चाहनाअनुसार जीवन बाँच्ने सम्भावना हाम्रा लागि कति महत्वपूर्ण छ भन्ने उनीहरूलाई थाहा थिएन ।’

उनले युक्रेनी नागरिकलाई पनि बधाइ दिए । ‘५० दिनसम्म हाम्रो रक्षा उपलब्धि हो । दशौँ लाख युक्रेनीको उपलब्धि हो ।’

गत फेब्रुअरी २४ यता रुसले युक्रेनमाथिको आक्रमणलाई जारी राखेको छ । पछिल्लो समय रुसी आक्रमणको प्रमुख निशानामा पूर्वी एवम् दक्षिणी युक्रेन रहेको बताइएको छ ।