काठमाडौं– लुम्बिनी प्रदेशकी राज्यमन्त्री बिमला वलीलाई तत्काल सरकारबाट हटाउन नेकपा एमालेले माग गरेको छ । उनी महिलामाथि हातपात गरेको अभियोगमा प्रहरी हिरासतमा पुगेपछि नैतिक रुपमा राजीनामा दिन एमालेले बताएको छ ।

वलीलाई तत्काल पदबाट हटाउन एमालेका सांसदहरूले माग गरेका छन् । उनीहरूले सरकारबाट फिर्ता नबोलाए प्रदेश संसद चल्न नदिने चेतावनीसमेत दिएका छन् ।

वली सूर्य चिह्नबाट निर्वाचित प्रदेश सांसद हुन् तर उनले नेकपा विभाजन भएपछि माओवादी केन्द्र रोजेकी थिइन् । यसअघि पनि वली विवादमा पर्दै आएकी थिइन् ।

लुम्बिनी प्रदेशकी स्वास्थ्य राज्यमन्त्री समेत रहेकी वलीविरुद्ध मीना भण्डारी बस्नेतले अभद्र व्यवहारमा जाहेरी दिएपछि उनलाई प्रहरीले नियन्त्रणमा लिएको हो ।

आज बिहानै तुल्सीपुरस्थित प्रेमी एकराज बस्नेतको घरमा गएर वलीले उनकी पत्नी मीना भण्डारीमाथि आक्रमण गरेको उनीमाथि आरोप छ । रिपोर्टका अनुसार उक्त घटनापछि स्थानीयले वलीलाई कोठामा थुनेर प्रहरीको जिम्मा लगाएका थिए । उनी अहिले प्रहरी हिरासतमा छिन् भने उनका प्रेमी भनिएका एकराज बस्नेतलाई प्रहरीले खोजी गरेको छ ।