काठमाडौं- पृथ्वीमा अनेक विषालु जनावर पाइन्छन् । जनावर मात्रै नभएर मानिसको ज्यानै लिने केही बोटबिरुवा पनि पृथ्वीमा पाइन्छन् । तर संसारको सबैभन्दा विषालु बोट के होला कहिले विचार गर्नुभएको छ ?

हालै अमेरिकाको फ्लोरिडा राज्यमा भेटिएको एउटा बिरुवा भने संसारकै सबैभन्दा विषालु रहेको पाइएको छ । यसलाई गिनिज बुक अफ द वर्ल्ड रेकर्ड पनि सबैभन्दा विषालु बोट भनेर दर्ता गराएको छ ।

फ्लोरिडाको एभरग्लेड दलदली इलाकामा पाइने मान्सानेल नाम गरेको यो बोट आकारमा झण्डै आप वा स्याउको बोटजस्तो छ । यसमा स्याउजस्तै फल पनि लाग्छ । तर, यो स्याउ खायो भने एकै छिनमा मानिसलाई कठोर पीडा मात्रै हुन्न, मानिसको ज्यानै पनि जान्छ ।

अमेरिकाको नेशनल इन्स्टिच्युट अफ हेल्थका अनुसार यसको चोपको सम्पर्कमा आएको खण्डमा छालामा कडा जलन महशुस हुन्छ । फ्लोरिडा विश्वविद्यालयको शोध अनुसार यो रुखको फल र चोपदेखि हरेक भाग विषालु छ ।

यतिमात्रै होइन यो रुखबाट प्राप्त दाउरा बालेको खण्डमा धुँवा आँखामा गएमा अन्धोपन समेत हुने गर्छ । स्थानीय भाषामा यसलाई ‘मृत्युको सानो स्याउ’ भन्ने गरिएको फ्लोरिडाको मायमीमा रहेको एनबीसी टेलिभिजन स्टेसनको अनलाइन संस्करणले जनाएको छ ।

(एनबीसी मायमीबाट)