काठमाडौं– दक्षिणपूर्वी एसियामा सक्रिय चिनियाँ आपराधिक गिरोह कानून कार्यान्वयन निकायहरुका लागि चुनौतिको रुपमा देखा पर्दै गएको छ ।

म्यान्मारबाट प्रकाशित हुने द इरावादी अखबारका अनुसार कम्बोडिया र थाइल्याण्डको सीमा क्षेत्रमा चिनियाँ आपराधिक गिरोह सक्रिय छन् । उनीहरु सुरक्षा निकायका लागि प्रमुख चुनौति बन्न थालेको उक्त अखबारले उल्लेख गरेको छ ।

कोरोना भाइरसको महामारीका बेलादेखि सो क्षेत्रमा चिनियाँ आपराधिक गिरोहको सक्रियता बढेको बताइएको छ । गिरोहले बेरोजगारीका कारण आर्थिक रुपमा जोखिममा रहेका युवाहरुलाई आपराधिक घटनाका लागि प्रयोग गर्दै आएको समेत द इरावादीले जनाएको छ ।

पछिल्लो समय दक्षिण पूर्वी एसियामा चीनले लगानीलाई बढाएपछि सो क्षेत्रमा चिनियाँ आपराधिक गिरोह पनि सक्रिय बन्न थालेको बताइएको छ ।

गत अप्रिल १० र ११ मा थाइ तथा कम्बोडियन प्रहरीले सुरक्षा कारवाही गरी कम्बोडियाबाट चिनियाँ गिरोहको नियन्त्रणमा रहेका ६८ जना थाइ कामदारलाई उद्धार गरेका थिए ।