काठमाडौँ- अजय देवगन यतिबेला आफ्नो फिल्म ‘रन वे ३४’ को प्रमोशनमा व्यस्त छन् । यसैक्रममा उनले आफ्नो प्रतिक्षित फिल्म सिंघमको बारेमा कुराकानी गरेका छन् ।

एक शोमा अन्तर्वार्ता दिँदै उनले फिल्मको काम यो वर्षको अन्तिमसम्म सुरु हुन् सक्ने बताए । ‘फिल्म छिट्टै सुरु हुन्छ । किनकी रोहित र उनको टिमले यसमा काम गरिरहेका छन् । यद्यपि कहिले सुरु हुन्छ भन्ने मलाई नै थाहा छैन’ अजयले भने ।

रोहित शेट्टी निर्देशित पछिल्लो फिल्म सूर्यवंशीमा अब ‘सिंघम ३’ आउने संकेत गरिएको छ । यद्यपि अजयले स्क्रिप्ट अझै फाइनल नभईसकेको बताए । ‘हामीले सानो हिन्ट दिएका हौँ । यद्यपि कुन कथामा फिल्म तयार गर्ने छलफलमै छ’ अजयले भने । अजय देवगन फिल्म्सका सदस्य समेत रहेका निर्देशक शेट्टीले आउँदो ‘सिंघम’ बाट दर्शकलाई बढी अपेक्षा रहेकाले विषयवस्तु छनौटमा ध्यान दिइरहेको बताए। ‘हामी दर्शकलाई निराश बनाउने किसिमको फिल्म ल्याउँदैनौं । त्यसैले हामी मेहनत गरिरहेका छौँ’ रोहितले भने । फिल्ममा अक्षय कुमार र रणवीर सिंहको समेत केमियो रहनेछ ।