काठमाडौँ- नेपाल भ्रमणमा रहेका अमेरिकी सेनाको प्रशान्त क्षेत्रका प्रमुख जनरल चार्ल्स ए. फ्लिनले पाँचखालस्थित नेपाली सेनाको तालिम केन्द्रको भ्रमण गरेका छन् ।

चार दिने नेपाल भ्रमणका लागि बिहीबार काठमाडौं आइपुगेका फ्लिनले आजै शिवपुरीस्थित सैनिक कमाण्ड एवम् स्टाफ कलेजको भ्रमण समेत गरेका छन् ।

पाँचखालमा फ्लिनलाई त्यहाँको शान्ति कार्य निर्देशनालयका निर्देशकले स्वागत गरेका थिए । भ्रमणका क्रममा अमेरिकी टोलीलाई वस्तुस्थितिलगायत विविध पक्षबारे जानकारी गराएको जङ्गी अड्डाले जनाएको छ ।

त्यस्तै, शिवपुरी भ्रमणका क्रममा अमेरिकी टोलीले स्टाफ कलेजमा तालिम लिइरहेका शिक्षार्थीहरुसँग अन्तर्क्रिया गरेको सेनाले जानकारी दिएको छ । फ्लिनले कलेज परिसरमा वृक्षारोपण समेत गरेका थिए ।

तस्वीरहरु- नेपाली सेना