काठमाडौं– आफ्नो मुलुकमा कोरोना भाइरसको पहिलो संक्रमित देखिएको घोषणा गरेको केही घण्टा नबित्दै उत्तर कोरियाले छोटो दूरीको ब्यालिष्टिक क्षेप्यास्त्र परीक्षण गरेको छ ।

राजधानी प्योङ्यङस्थित सुनान अन्तर्राष्ट्रिय विमानस्थल नजिकैबाट क्षेप्यास्त्र परीक्षण गरेको अन्तर्राष्ट्रिय समाचार संस्था रोयटर्सले जनाएको छ । ती क्षेप्यास्त्र जापानको विशेष आर्थिक क्षेत्रबाहिर खसेको जापानको एनएचके प्रसारण संस्थाले जनाएको छ ।

दक्षिण कोरियामा नयाँ कन्जरभेटिभ राष्ट्रपति युन सुक इयोलले शपथ ग्रहण गरेपछि उत्तर कोरियाले पहिलो पटक क्षेप्यास्त्र परीक्षण गरेको हो । यो यस वर्षको उत्तर कोरियाको १६ औं हतियार परीक्षण रहेको रोयटर्सले जनाएको छ ।

यसअघि गत शनिबार उत्तर कोरियाले क्षेप्यास्त्र परीक्षण गरेको थियो । उक्त क्षेप्यास्त्र पनडुब्बीबाट प्रहार गर्न सकिने किसिमको रहेको जनाइएको छ ।