हेलम्बु । खानेपानीमन्त्री उमाकान्त चौधरीले मेलम्चीको पानी काठमाडौँवासीलाई खुवाउने पूर्वप्रधानमन्त्री तथा सन्त नेता कृष्णप्रसाद भट्टराईको सपना पूरा भएको बताएका छन् ।

मेलम्ची खानेपानी आयोजनाको बाँधस्थल अम्बाथानमा रहेको १ नम्बर डाइभर्सन गेटबाट पानी पथान्तरण गरी ३८ नम्बरको गेट खोलेर सुन्दरीजलतर्फ पथान्तरणका क्रममा उनले यस्तो बताएका हुन् ।

गतअसार १ गते र त्यसपछि मेलम्ची नदीमा आएको बाढीका कारण आयोजनास्थल हेडवक्र्स क्षेत्रमा क्षति पुगेको थियो ।

सो अवसरमा मन्त्री चौधरीले मेलम्चीको पानी नयाँ वर्ष २०७९ को वैशाखसम्ममा काठमाडौँको धारामा पुग्ने बताए ।

उनले सरकारले गरेको घोषणा र प्रतिबद्धताअनुरुप चैत मसान्तभित्रै पानी सुरुङमा हाल्न सफल भएकोमा खुशी व्यक्त गरे ।

मन्त्री चौधरीले विभिन्न बाधा, अड्चन र समस्याका बाबजुद पनि मेलम्ची अयोजनाको पुनःनिर्माण गरी पानी पथान्तरण कार्य सम्पन्न गराउन योगदान दिने मन्त्रालय र

आयोजनाका कर्मचारी, प्रदेश सरकार, स्थानीय सरकार, स्थानीय नागरिक, विज्ञ, निर्माण कम्पनी सिनो हाइड्रो, परामर्शदातालाई धन्यवाद दिए ।

यस अवसरमा राष्ट्रिय योजना आयोगका उपाध्यक्ष विश्व पौडेल, बागमती प्रदेशका स्वास्थ्यमन्त्री निमा लामा, मन्त्रालयका सचिव सुरेश आचार्य, आयोजनाका कार्यकारी

निर्देशक बासुदेव पौड्याल प्रमुख जिल्ला अधिकारी बेदनिधि खनाललगायतको उपस्थिति थियो ।

गत वर्ष चैत १७ गतेदेखि राजधानीमा मेलम्ची खानेपानी आयोजनाको पानी वितरण गरिएको थियो । तर, असार १ गते आएको बाढीले क्षति पुर्‍याएको थियो ।

करिव दुई साताभित्रै मेलम्चीको पानी सुन्दरीजल पानी प्रशोधन केन्द्रमा आइपुग्ने भएको छ ।
सुरुङमा प्रतिसेकेण्ड २६० लिटर पानी खसालिएको छ ।