काठमाडौँ– सञ्जय दत्तको जीवनीमा बनेको फिल्म ‘सन्जु’ ले बक्स अफिसमा निकै कमाल गर्‍यो।

राजकुमार हिरानी निर्देशित फिल्मले बक्स अफिसमा कमाल मात्र देखाएन, उनी प्रति दर्शकको मनमा श्रद्धा पनि बढायो । फिल्म हेर्नेले संजयको जीवनलाई बुझे । त्यसपछि संजयको फिल्म नभएका होइनन् । तर, कुनै फिल्मले दर्शकको साथ पाउन सकेन किनकी फिल्म नै राम्रो थिएनन् ।

सञ्जय आफैँले निर्माण गरेको फिल्म ‘प्रस्थानम’ ले समेत दर्शकको माया नपाएपछि उनले यतिबेला ‘मुन्नाभाई चले अमेरिका’ मा काम गर्ने मन बनाए । उनले आफ्नो नजिकका निर्देशक हिरानीलाई फिल्मलाई सक्दो चाडो फ्लोरमा लान आग्रह समेत गरेका छन् । हिरानीको डेब्यु फिल्म मुना भाइ एमबीबीएस थियो र त्यसपछिको दोस्रो लगे रहो मुन्नाभाई । यी दुई फिल्मले सञ्जय दत्तको छवि मात्र बदलिएन, बलिउडमा धर्मराएको करियरलाई अगाडि समेत बढायो ।

तेस्रो सिरिजको चर्चा चल्दै गर्दा सञ्जय जेल परे । त्यसपछि फिल्मको काम रोकियो तर दर्शकलाई यतिबेला पनि फिल्मको प्रतिक्षा छ । दर्शकसँगै फिल्मको प्रतिक्षा सञ्जयलाई पनि छ । उनी आफ्नो करियरलाई अगाडि बढाउन मुन्ना भाइ सिरिजलाई दर्शक माझ ल्याउन चाहन्छन् । यद्यपि निर्देशक हिरानी पछिल्लो समय शाहरुख खानलाई लिएर फिल्म निर्माण गर्ने तयारीमा छन् ।

यही अप्रिलबाट फिल्मको छायांकन हुने भारतीय मिडियामा उल्लेख छ । यसले गर्दा सञ्जय पर्खाइ अझै बढ्ने देखिन्छ । तत्कालीन समयमा अमेरिकन राष्ट्रपति बाराक ओबामालाई भेट्ने कथा रहे ता पनि यतिबेला स्क्रिप्टलाई तयार गर्दा फेरिदो दर्शकको स्वादलाई ध्यान दिनु जरुरी रहेकाले पनि हिरानीले काम सुरु गर्न सकेका छैनन् ।