काठमाडौँ– शहीद स्मारक ए डिभिजन लिगअन्तर्गत शनिबारको खेलमा मछिन्द्र क्लबले जित हासिल गरेको छ ।

त्रिपुरेश्वरस्थित दशरथ रंगशालामा भएको खेलमा मछिन्द्रले च्यासल युथ क्बललाई २–० गोलले पराजित गरेको हो । मछिन्द्रका लागि विमल घर्तीमगर र सुनिल बलले १–१ गोल गरेका थिए ।

विमलले खेलको १७ औँ मिनेटमा गोल गर्दै मछिन्द्रलाई १–० को अग्रता दिलाएका थिए ।

त्यसपछि १७ औँ मिनेटमा सुनिलले गोल गरी अग्रतालाई दोब्बर पारेका थिए ।

दोश्रो हाफमा भने कुनै गोल हुन सकेन । यो जितसँगै मछिन्द्र १० खेलमा २६ अंकका साथ शीर्ष स्थानमा छ । च्यासल भने ५ अंकका साथ अन्तिममा रहेको छ ।

त्यस्तै, सातदोबाटोस्थित एन्फा कम्प्लेक्समा भएको खेलमा सातदोबाटो युथ क्लबले नेपाल पुलिस क्लबलाई १–० गोलले पराजित गरेको छ ।

१९ औँ मिनेटमा आकाश बुढामगरले पेनाल्टीमार्फत् गरेको गोल नै सातदोबाटोलाई जित दिलाएको थियो ।

यो जितसँगै सातदोबाटो १० खेलमा १५ अंकका साथ पाँचौ स्थानमा उक्लिएको छ । पुलिस भने १० अंकका साथ १० औँ स्थानमा छ ।