शरीरका लागि क्याल्सियम नभई हुँदैन । हड्डी र दाँतको स्वास्थ्यका लागि क्याल्सियम नभई नहुने खनिज तत्त्व हो । तर शरीरमा क्याल्सियम कमी भयो भने के हुन्छ ?

क्याल्सियमले मस्ष्तिकबाट प्राप्त हुने सन्देशलाई कोषसम्म पुर्‍याउन सन्देशवाहकको रूपमा भूमिका निर्वाह गर्दछ । यस्तै शरीरमा हर्मोनको निष्कासन, रगत जम्नु, मांसपेशी खुम्चनु तथा आराम अवस्थामा ल्याउनका लागि समेत भूमिका निर्वाह गर्दछ । तर शरीरमा क्याल्सियमको कमी भयो भने शरीरको आवश्यकता पूर्ति गर्न हड्डी तथा दाँतमा भएको क्याल्सियमको पनि प्रयोग हुन थाल्छ ।

कुनै पनि कारणले शरीरमा क्याल्सियमको कमी भयो भने त्यो अवस्था खतरनाक हुन सक्छ । शरीरमा क्याल्सियमको कमीले गर्दा हुने रोगलाई हाइपोक्याल्सेमिया भनिन्छ । शरीरको रगतमा क्याल्सियमको मात्रा कम हुँदा हाइपोक्याल्सेमिया रोग लाग्छ । यो रोग लामो समय रहेमा र उपचार नगरेमा दाँतसम्बन्धी समस्या, मोतिया बिन्दु, मस्तिष्कमा परिवर्तन र हड्डी मक्किने रोग लाग्न सक्छ ।