काठमाडौँ- बेलायतमा सत्तारुढ कन्जरभेटिभ पार्टी नेतृत्वका लागि आधा दर्जनभन्दा बढी नेताले उम्मेदवारीको घोषणा गरेका छन् । निवर्तमान बेलायती प्रधानमन्त्री बोरिस जोनसनलाई विस्थापित गर्ने दौडमा दुई जना पूर्वस्वास्थ्यमन्त्रीहरु साजिद जावेद र जेरेमी हन्टले पनि कन्जरभेटिभ पार्टी नेतृत्व सम्हाल्ने र प्रधानमन्त्री बन्ने दौडमा आकांक्षा देखाएका छन् ।

पार्टी नेतृत्वका लागि आकांक्षा राख्ने उनीहरू पछिल्ला दुई नेता हुन । दुबैले आफ्ना योजनाहरू घोषणा गरेका छन् । आफू एकमात्र प्रमुख उम्मेदवार रहेकोमा हन्टले जोड दिएका छन् । उनले जोनसनको मन्त्रिपरिषद्मा काम भने गरेका छैनन् । यसअघि ६ जनाले आफ्नो आकांक्षा देखाएका थिए ।

हाल प्रधानमन्त्रीका सबै दाबेदारको मुख्य मुद्दा कर बनेको छ । जाभिद र हन्टले कर कटौतीका लागि आह्वान गरेका छन् । जाविदले राष्ट्रिय बीमामा वृद्धि रद्द गर्ने वाचा गर्दै आएका छन् ।

प्रधानमन्त्रीको दौडमा चान्सलर नदिम जाहावी र यातायातमन्त्री ग्रान्ट साप्स छन् । यी दुबैले पनि कर कटौती गर्ने वाचा गरेका छन् । यतिबेला कर वृद्धि गरेको आरोपमा पूर्वमन्त्री ऋषि सुनाकको आलोचना भइरहेको छ । त्यस्तै, न्यून कर राज्यको आह्वान गर्ने महान्यायाधिवक्ता सुएला ब्रेभरम्यानले पनि अभियान सुरु गरेका छन् ।

विदेशमन्त्री लिज ट्रस पनि प्रधानमन्त्रीको दौडमा रहेको उनका सहयोगीले बताएका छन् । उनी सुनकले ल्याएको स्वास्थ्य कर उल्टाउने वाचाका साथ पार्टीको नेतृत्व दौडमा प्रवेश गरेकी छिन् ।

त्यस्तै, पूर्व समानतामन्त्री केमी बडेच र विदेश मामिला समितिका अध्यक्ष टम टुगेनधाट पनि जोनसनलाई विस्थापित गर्ने दौडमा छन् । पार्टीको नेतामा विजयी भएका व्यक्ति प्रधानमन्त्री हुनेछन् ।