दोहा– कुवेतका लागि नेपाली राजदूत दुर्गाप्रसाद भण्डारीले कामदार र कम्पनीबीच करार पत्रमा उल्लेख भएका कुरा इमान्दारीपूर्वक पालना हुनुपर्ने बताएका छन् ।

त्यहाँस्थित नेपाली दूतावासको सभाकक्षमा राजदूत भण्डारी र कुवेतमा नेपाली कामदार लिने कम्पनीका प्रतिनिधिहरुबीच भएको छलफल भएको छ ।

नेपाली कामदार र कम्पनीबीचको सम्बन्धबारे छलफल कार्यक्रममा राजदूत भण्डारीले कम्पनीहरुले विशेषतः चुनौतीपूर्ण तथा जोखिमयुक्त कार्यहरूमा खटाउनुपूर्व कार्यस्थलमा विशेष निरोधात्मक सुरक्षा व्यवस्था अपनाउनुपर्ने बताएका छन् ।

कामदारको तलब-भत्ता लगायतका सुविधाहरू तोकिएको समयमा दिनुपर्ने, कामदार र कम्पनीबीच सम्पन्न करार पत्रमा उल्लेख भएका कुराहरूको इमान्दारीपूर्वक पालना गर्नुपर्ने, आवास, खानाको उचित प्रवन्ध सहित कामदारप्रति कम्पनी व्यवस्थापनले उचित व्यवहार र सम्मान गर्नुपर्नेमा उनले जोड दिएका थिए ।

यसैगरी कामदार भर्ना लिनुपूर्व कम्पनीहरुले कामको प्रकृति, आवश्यक जनशक्ति, सेवा सुविधा लगायतका विषयमा भर्ती एजेन्सीहरूसँग सोझै छलफल गरी स्पष्ट पार्नुपर्ने बताए ।

कामदार भनेका कम्पनीका इन्जिन रहेको बताउँदै उनले रोजगारदाता कम्पनीको मेरूदण्डको रूपमा रहेका कामदार र कम्पनी व्यवस्थापन बीचको सुमधुर सम्बन्धबाट कम्पनीको प्रभावकारीता बढ्ने, बढी उपलब्धी हासिल हुने भएकाले असल श्रम सम्बन्धको थप विकासका लागि कम्पनीको तर्फबाट विशेष सक्रियता देखाउनुपर्ने उनको भनाइ रहेको थियो ।

राजदूत भण्डारीले कामदारलाई कुवेत आएपश्चात कार्यस्थलमा खटाउनु पूर्व काम, यहाँको रितिथिति, स्थानीय कानूनी व्यवस्थाको सामान्य ज्ञान, गर्न हुने-नहुने कामका बारे जानकारी दिन आगमन पश्चातको अभिमूखिकरणको व्यवस्था गर्न कम्पनीका प्रतिनिधिहरूलाई सुझाव दिंदै त्यसका लागि कम्पनीले चाहेमा दूतावासले कम्पनीलाई आवश्यक सहयोग गर्न सक्ने बताए ।

कार्यक्रममा श्रम सहचारी हेमकुमार अधिकारीले मागपत्र प्रमाणीकरण प्रक्रियामा गर्नुपर्ने कार्यबारे जानकारी दिएका थिए भने दूतावासका मिनिष्टर काउन्सेलर प्रकाशमणी पौडेलले उपस्थित सबैको स्वागत गरेका थिए ।

उक्त कार्यक्रममा सहभागीका तर्फबाट समेत नेपाली कामदारको प्रशंसा गर्दै उनीहरूलाई कम्पनीको तर्फबाट दिने तलब, सुविधा लगायत सुरक्षा आदिबारे वक्ताहरूले प्रतिवद्धता व्यक्त गरेका थिए ।