काठमाडौँ- संयुक्त राष्ट्रसङ्घले अफ्रिकी मुलुक इथियोपियाका खडेरी प्रभावितलाई खाद्यान्न उपलब्ध गराउने भएको छ । खडेरी प्रभावितलाई मानवीय सहयताको खाँचो रहेको भन्दै राष्ट्रसङ्घले खाद्यान्न उपलब्ध गराइने जनाएको हो ।

राष्ट्रसङ्घका महासचिव एन्टोनियो गुटरेसका प्रवक्ताका अनुसार संयुक्त राष्ट्रसङ्घले मानवीय सहायता निकायलाई खडेरीबाट पीडित भएका एक करोड ६० लाख र बाढी प्रभावित १७ लाख इथियोपियालीलाई सहयोग गर्न आह्वान गरिएको छ ।

इथियोपियामा गएको ४० वर्षयताकै सबैभन्दा खराब खडेरी परेको पाइएको छ । यसबाट धेरैभन्दा धेरै नागरिकले अत्यावश्यक वस्तुको अभाव झेलिरहेका छन् ।

महासचिव एन्टोनियो गुटरेसका प्रवक्ता स्टेफान डुजारिकले त्यहाँको खडेरी इतिहासकै सबैभन्दा खराब प्रकृतिको रहेको भन्दै यसबाट लाखौँ मानिस विस्थापित भएका बताएका छन् ।

उनले यो खडेरीका कारण करिब ३५ लाख पशु चौपायासमेत मरेका जानकारी दिएका छन् । संयुक्त राष्ट्रसङ्घको मानवीय सहयातासम्बन्धी एजेन्सीलाई उद्धृत गर्दै उनले जनाएअनुसार खडेरी पीडितमध्ये अधिकांशले खाद्यान्नको अभाव झेल्नुपरेको छ ।

साथै इथियोपियाका बालबालिका तथा महिलाले आवश्यक पोषणको अभावमा विभिन्न प्रकृतिका रोगबाट झेल्नुपरेको पाइएको संयुक्त राष्ट्रसङ्घीय निकायले जनाएको छ ।

संयुक्त राष्ट्रसङ्घले इथियोपियामा एकातर्फ खडेरीले मानिसमा असर गरेको र अर्कातर्फ बाढीका कारण पनि धेरै नागरिकको ज्यान गएको र विस्थापित हुनुपरेको जनाएको छ ।