काठमाडौँ- इरानमा एउटा भवन भत्किँदा दुई जनाको मृत्यु भएको छ । मुलुकको पश्चिमा रहेको केरमानशाह प्रान्तमा तीन तले भवन भत्केको हो ।

ग्यास विस्फोटको कारणले दुर्घटना भएको बताइएको छ । केरमानशाहको पावेह काउन्टीको नौसुद सहरमा ग्यास विस्फोटका कारण तीन तले भवन भत्किएको राज्य समाचार एजेन्सी इर्नाले जानकारी दिएको छ । .

‘अहिलेसम्म दुईको ज्यान गइसकेको छ, चार जना घाइते भएका छन् र कम्तीमा एक जना बेपत्ता छन्,’ राष्ट्रिय आपतकालीन सेवाका प्रवक्ता मोजताबा खालेदीले सरकारी टेलिभिजनलाई बताएका छन् ।

गत मे २३ मा दक्षिणपश्चिमी खुजेस्तान प्रान्तको अबदान सहरमा निर्माणाधीन १० तले भवन भत्किँदा ४३ को मृत्यु भएको थियो । पछिल्लो समय इरानमा भवन भत्किने दुर्घटनाहरु बढेको बताइएको छ ।