काठमाडौं– रुसी राष्ट्रपति भ्लादिमिर पुटिनले युक्रेनमा जारी आक्रमणको बचाउ गरेका छन् । दोश्रो विश्वयुद्धमा तत्कालीन नाजी जर्मनीको पराजयको ‘विजय दिवस’ मा सम्बोधन पुटिनले युक्रेनमा जारी ‘विशेष सैनिक कारवाही’ को बचाउ गरेको बीबीसीले जनाएको छ ।

उनले पूर्वी युक्रेनमा जारी लडाइँमा लडिरहेका रुसी फौज तथा स्वयंसेवीहरू ‘मातृभूमि र यसको भविष्यका लागि लडिरहेको’ समेत टिप्पणी गरे ।

सम्बोधनका क्रममा उनले पश्चिमा मुलुकहरुले ‘हाम्रो भूमिमा आक्रमण गर्ने’ तयारी गरिरहेको आरोप समेत लगाएको बीबीसीले जनाएको छ ।

उनले उत्तर एटलान्टिक सन्धि संगठन नेटोलाई ‘स्वभाविक खतरा’ को रुपमा टिप्पणी गर्दै आफूले थालेको ‘विशेष सैन्य कारवाही’ आवश्यक रहेको र यो ‘सही निर्णय’ भएको समेत बताए ।

उनले युक्रेनमा जारी द्वन्द्वबाट प्रभावित परिवारलाई राज्यले ख्याल राख्न सके जती सबै गर्ने समेत आश्वासन दिए । ‘हरेक सैनिक र सैनिक अधिकारीको मृत्यु हाम्रा लागि पीडादायी छ ।’ पुटिनले भने ।