काठमाडौँ– अमेरिकाले रुसी आक्रमणको सामना गरिरहेको युक्रेन र अन्य अमेरिकी साझेदारहरुका लागि थप झण्डै २ अर्ब ७० करोड अमेरिकी डलरको सहयोग घोषणा गरेको छ । अमेरिकी रक्षामन्त्री लोयड अस्टिनले जर्मनीको रामस्टाइनमा रहेको अमेरिकी हवाई अखडामा यस्तो सहयोगको घोषणा गरेको बीबीसीले जनाएको छ ।

यसमध्ये युक्रेनलाई हातहतियारका लागि ६७ करोड ५० लाख डलर प्रदान गरिनेछ ।

नयाँ सहयोग प्याकेजमा हवित्जर तोपखाना प्रणाली, हम्भी बख्तरबन्द गाडीहरु, गोलाबारुद, एम्बुलेन्स र ट्यांकभेदी प्रणाली समावेश छन् ।अमेरिकाले यसअघि नै युक्रेनका लागि १३ अर्ब डलर सहयोगको घोषणा गरिसकेको छ ।

अमेरिकाको बाइडेन प्रशासनले दीर्घकाली सुरक्षा सुदृढीकरणका लागि युक्रेन र नेटोमा आबद्ध भएका वा नभएका युक्रेनका अरु १८ छिमेकी मुलुकहरुलाई २ अर्ब डलर सहयोग गर्ने घोषणा गरेको जनाइएको छ ।

बाइडेन प्रशासनले यसबारे कंग्रेसलाई जानकारी गराइने जनाएको छ । यसैबीच अमेरिकी विदेशमन्त्री एन्टोनी ब्लिन्केन युक्रेन भ्रमणका क्रममा राजधानी किभ पुगेका छन् ।

कुनै पूर्वघोषित योजनाबिना आकस्मिक रुपमा अमेरिकी विदेशमन्त्री ब्लिन्केन युक्रेन पुगेका हुन् । रुसी आक्रमणविरुद्ध ऐक्यबद्धता जनाउन उनी युक्रेन पुगेको अन्तर्राष्ट्रिय सञ्चारमाध्यमले जनाएका छन् ।