काठमाडौँ– फिल्म ‘ह्यारी कि प्यारी’ ले प्रदर्शन तय गरेको छ । गत चैतमा सुटिङ सकिएको फिल्म ‘ह्यारी कि प्यारी’ ले कात्तिक २५ गतेलाई प्रदर्शन तय गरेको हो । फिल्मको निर्माण पक्षले एक पोस्टर सार्वजनिक गर्दै प्रदर्शनको विषयमा जानकारी दिएको हो । नेपालको वैवाहिक परम्पराको सेरोफेरोमा बनेको फिल्ममा जितु नेपाल र साम्राज्ञीराज्य लक्ष्मी शाहको मुख्य भूमिका रहेको छ । फिल्म विजय बराल पनि महत्वपूर्ण भूमिकामा छन् । फिल्मको एक गीतमा रेखा थापाले नृत्य गरेकी छिन् ।

यद्यपि फिल्मले सार्वजनिक गरेको पोस्टरले राम्रो प्रतिक्रिया बटुल्न सकेको छैन । दशक अगाडिको झल्को दिने किसिमको पोस्टरले गर्दा फिल्म प्रति उत्साह बोकेको फिल्मकर्मी वा दर्शक निराश भएको प्रतिक्रिया सामाजिक सञ्जालमा आइरहेको छ । सार्वजनिक पोस्टरमा साम्राज्ञी दुलहीको भेषमा छिन् भने जितु नेपाली ढाकाटोपीमा पञ्चेबाजा बजाइरहेका छन् । हाल यो फिल्मको पोस्ट प्रोडक्सनको काम भइरहेको छ । 

यो फिल्मलाई कपिल रिजालले निर्देशन गरेका हुन् । बेलायतमा बसोबास गर्ने गरेका कपिल रिजाल गीतकार तथा चिकित्सक भोला रिजालका छोरा हुन् ।