काठमाडौँ– गायक प्रकाश दुतराजले नयाँ गीत ‘मन भुल्छ’ सार्वजनिक गरेका छन् । यो उनको ‘जाम भो माईली’पछिको अफिसियल गीत हो । प्रकाश आफ्ना गीतका शब्दलहर आफै बुन्दै आएका छन्, आफै भाका हाल्दै आएका छन् । ‘मन भुल्छ’ मा पनि उनकै शब्द र संगीत छ । कृष्ण बिकले गीतको एरेन्ज गरेका छन् । गीतमा प्रकाशसँगै गायिका शान्तिश्री परियारले स्वर दिएकी छिन् । 

‘मन भुल्छ’ को भिडियोमा भने प्रकाशले नयाँ र रचनात्मक प्रयोग छन् । आफ्ना यसअघि स्रोता तथा दर्शकले रुचाएका सिर्जनाभित्रका पात्रहरूलाई एउटै भिडियोभित्र प्रस्तुत गरेका छन् । प्रकाशको बैनी झ्यालैमा, चोली मैलै भो, घर कता हो बैनीको र जाम भो माइली भित्रका पात्रहरूलाई ‘मन भुल्छ’ को भिडियोमा प्रस्तुत गरेका हुन् । भिडियोमा प्रकाश दुतराजसँगै सुजल बम, भूमिका गिरी, जुना सुन्दास, आयुष्मा कार्की, विजय पुन, रोशनी कार्कीलाई प्रस्तुत गरिएको छ । 

भिडियोमा उनले यसअघिका पात्रको पहिरन शैली, अभिनयलाई पनि उही रुपमा प्रस्तुत गर्ने प्रयास गरेका छन् । भिडियोमा उनी ‘क्रियटर’ को भूमिकामा प्रस्तुत छन् र उनले अघिल्ला सिर्जनाका पात्रहरूलाई कल्पना गरेका छन् । मौलिक मिठासले भरिपूर्ण सिर्जनाहरु ल्याउँदै आएका प्रकाशका सिर्जनाहरुलाई स्रोता दर्शकले रुचाउँदै आएका छन् । मौसम हिमालीको निर्देशन रहेको ‘मन भुल्छ’ को भिडियोलाई अनिल के। मानन्धरले छायांकन गरेका हुन् । नवीन घर्ती मगरको सम्पादन तथा कलरपछि भिडियो सार्वजनिक गरिएको हो ।