काठमाडौँ – बलिउडमा अभिनेता सलमान खान र साजीद नडियाडवाला मिल्ने साथी हुन् ।  

उनीहरूले मुझ्से सादी करोगी, जाने मन जस्ता फिल्ममा सहकार्यसमेत गरेका छन् । पछिल्लो समय यी दुईको सहकार्य ‘कभी इद कभी दिवाली’ मा हुने चर्चा थियो । सलमान आफैँले सामाजिक सञ्जालमार्फत यसको बारेमा जानकारीसमेत दिएका थिए । यद्यपि अब यो फिल्मको निर्माताको रूपमा साजिद नरहने भएका छन् ।

पछिल्लो समय बागी ३, तडप र बच्चन पाण्डेले बक्स अफिसमा खराब कलेक्सन गरेपछि उनी केही समय निर्माणबाट टाढिएका छन् । 

बलिउड हंगामाका अनुसार साजिद आफ्नो प्रोडक्सनको रिभ्यु गर्न चाहन्छन् । र, ठूला बजेटका फिल्महरू गर्ने पक्षमा छैनन् । यद्यपि सलमान फिल्मको छायांकन छिटै गर्न चाहन्छन् । यसैले गर्दा यसपटक सलमान र साजिद अलग भएका छन् । साजिदले फिल्म छाडेपछि कसले निर्देशन गर्छ भन्ने चर्चा बि-टाउनमा राम्रै छ । 

चर्चाकै बीच सलमानले नै फिल्म निर्देशन गर्ने संकेत उनका एक नजिकका साथीले गरेका छन् । ती निर्माताले बलिउड हंगामाको रिपोर्टमा सलमानले पछिल्लो केही वर्ष यता स्क्रिप्ट, छायांकन र सम्पादनमा पनि आफ्नो सहभागिता दिँदै आएकोले फिल्म निर्देशन गर्न सक्ने बताएका छन् । सलमानले स्क्रिप्ट फाइनल गर्छन्, सेटमा आफूसँगै अन्य कलाकारको सिनेलाई पनि हेर्छन्, सम्पादनमा पनि बस्छन् त्यसैले उनले फिल्म निर्देशन गर्न सक्छन ती प्रोड्युसरले भने ।