काठमाडौं– इजरायलमा भएको गोलीकाण्डमा कम्तीमा दुई जनाको मृत्यु भएको छ । इजरायलको तेल अभिभ शहरमा भएको गोलीकाण्डमा अरु १२ जना घाइते भएका छन् ।

एकजना बन्दुकधारीले तेल अभिभ शहरको व्यस्त दिजेङ्गोफ सडकमा रहेको एउटा बारमा आक्रमण गरेका थिए । जथाभावी गोली प्रहार गरी फरार भएका उनलाई खोज्न १ हजार सुरक्षाकर्मी परिचालन गरिएको अन्तर्राष्ट्रिय सञ्चारमाध्यमले जनाएका छन् ।

बीबीसीका अनुसार उनलाई पछि सुरक्षाकर्मीले घटनास्थलबाट ६ किलोमिटर टाढा एउटा मस्जिदमा लुकेर बसेको अवस्थामा फेला पारेका थिए । सुरक्षाकर्मीको कारवाहीमा बन्दुकधारी मारिएको बीबीसीले जनाएको छ ।

बन्दुकधारी इजरायली अधिनस्थ प्यालेस्टाइनको जेनिन शहरका बासिन्दा २९ वर्षे राद हाजेम रहेको इजरायली प्रहरीले जनाएको छ ।

पछिल्ला केही समययता इजरायलमा यस्ता आक्रमणको घटनामा वृद्धि भएको बीबीसीले जनाएको छ । पछिल्ला केही सातायता जारी यस्ता आक्रमणमा हालसम्म १३ जनाको मृत्यु भइसकेको छ ।