काठमाडौं–साँखुस्थित शाली नदीमा माधवनारायणको एक महिने व्रतका क्रममा मंगलबार विशेष स्नान गरिएको छ ।

ब्रतालुहरुले शाली नदीमै स्नान गरी माधवनारायणको पुजाआजासमेत गरेका छन् । माधवनारायणका बर्तालुले माघ शुक्ल सप्तमीमा साँखु बजारमा पल्टँदै सहस्रधाराको जलबाट स्नान गर्ने परम्परा छ । यो सप्तमीलाई लगला सप्तमी पनि भनिन्छ । माघ शुक्ल नवमी अर्थात् द्रोण नवमीका दिन बर्तालुले शालीनदी किनारमा बसेर खीर खाने परम्परा छ ।

पौष शुक्ल पूर्णिमादेखि सुरु भएको माधवनारायण ब्रत माघ शुक्ल पूर्णिमासम्म चल्छ । साँखु शालीनदीमा यस वर्ष १०६ महिला र १९ पुरुष गरी १२५ जना ब्रत बसेका छन् । माघ महिनामा माधव नारायणको ब्रत गरेमा मनोकाक्षा पूरा हुने, विवाहित महिलाले अटल सौभाग्य एवं सुख शान्ति र अविवाहित महिलाले चिताएको वर पाउने धार्मिक विश्वास छ ।

सत्ययुगमा हिमालय पुत्री पार्वतीले महादेव स्वामी पाऊँ भनी सर्वप्रथम माधवनारायण एवं स्वस्थानीको ब्रत बसेको स्कन्द पुराणमा उल्लेख छ । त्यसबेलादेखि नै माधवनरायण र स्वस्थानीको ब्रत बस्ने परम्परा सुरु भएको विश्वास गरिन्छ । माघ शुक्ल पूर्णिमाका दिन बर्तालुले साङ्गे गरी ब्रत समापन गर्दछन् ।