दोहा – आगामी  २० नोभेम्बरदेखि कतारमा सुरू हुने फिफा विश्वकपको समयमा दोहा कर्नेशमा सवारी साधन चलाउन नपाउने भएका छन् ।

बुधबार कतारको मन्त्रिपरिषद्को बैठकले निर्णय गर्दै १ नोभेम्बरदेखि १९ डिसेम्बरसम्म दोहाको कर्नेश सडकमा पैदलयात्रीका लागि मात्र खुल्ला गरिने जनाएको छ ।

सरकारी कर्मचारीहरू २० प्रतिशतले कार्यालय गएर काम गर्ने छन् भने बाँकी ८० प्रतिसतले घरबाटै काम गर्नेछन्। काम गर्ने समय बिहान ७ देखि ११ बजेसम्म हुनेछ ।

सरकारी सञ्चार कार्यालय (जीसीओ) का प्रवक्ता मोहम्मद नुवामी अल हजरीका अनुसार सुरक्षा, सैन्य, स्वास्थ्य र शिक्षा क्षेत्रमा भने यो निर्णय लागू हुने छैन ।

फिफा विश्वकप कतार २०२२ को आयोजना गर्ने देशको तयारीलाई ध्यानमा राख्दै मन्त्रिपरिषद्ले यो निर्णय गरेको हो।

निजी कम्पनीहरू भने सामान्य रूपमा सञ्चालन हुन पाउने छन् । २० नोभेम्बरदेखि १८ डिसेम्बरसम्म हुने प्रतियोगिताका लागि विश्वभरबाट २० लाख बढी दर्शक आउने अनुमान गरिएको छ ।