काठमाडौँ-  बेलायतका निवर्तमान प्रधानमन्त्री बोरिस जोनसनले मङ्गलबार आफ्नो उत्तराधिकारी लिज ट्रसलाई समर्थनको बाचा गरेका छन् । उनले बेलायती प्रधानमन्त्रीको रुपमा १० डाउनिङ स्ट्रिटमा आफ्नो विदाई सम्बोधनका क्रममा यस्तो बाचा गरेका हुन् ।

जोनसनको कार्यकाल ब्रेक्सिट र कोभिडको प्रभुत्व रहेको थियो । महारानी एलिजाबेथ द्वितीयसँग भेटवार्ता गर्न स्कटल्याण्ड जानुअघि जोनसनलाई उनका समर्थकहरुले जयजयकार र ताली बजाएर विदाई गरेका थिए ।

उनले भने ‘म लिज ट्रस र नयाँ सरकारलाई हरेक पाइलामा समर्थन गर्नेछु ।’ उनले आफ्नो सत्तारुढ कन्जरभेटिभ पार्टीलाई उर्जा सङ्कट समाधान गर्नका लागि आफ्नो मतभेदलाई पन्छाउन आग्रह गरेका छन् ।

उर्जा सङ्कट ट्रसको कार्यकालको निकट भविष्यमा चुनौतीका रुपमा देखा पर्ने अपेक्षा गरिएको छ ।

“यदि डिलिन (उनको कुकुर) र ल्यारी (डाउनिङ स्ट्रिटको मुसा मार्ने आधिकारिक बिरालो) ले उनीहरूको सामयिक कठिनाइहरू पछाडि राख्न सक्छ भने कन्जरभेटिभ पार्टीले पनि सक्छ,“ उनले थपे ।