काठमाडौँ– फिल्ममा अत्यधिक सफलता पाए पनि व्यक्तिगत जीवनमा सधैँ दुःख पाएकी मर्लिन मुनरोको जीवनीमा बनेको फिल्म ‘ब्लोन्ड’ नेटफ्लिक्समा प्रदर्शन हुँदैछ । मर्लिनको भूमिका यो फिल्ममा एना डे आम्र्सले निर्वाह गरेकी छिन् । मर्लिनले जीवनमा तीन चोटि विवाह गरिन् र तीनै सम्बन्धमा धोका पाइन् । ड्रग्स ओभर डोजका कारण उनको कलिलै उमेरमा मृत्यु भयो । तर कसै कसैले भने मर्लिनले आत्महत्या गरेको पनि भन्ने गरेका छन् । 

कलिलो उमेर १६ वर्षमै आफू भन्दा ५ वर्ष जेठा जेम्स डोरोथीसँग विवाह गरेकी मर्लिनले त्यसको कारण ‘फोस्टर होम’ बताएकी थिइन् । विवाह गरेर बाहिर निस्कन पाए स्वतन्त्र भएर बाँच्न पाइन्छ भन्ने उनको चाहना थियो । त्यसको केही समय पश्चात जेम्स अमेरिकी नेभीमा भर्ना भएपछि मर्लिन र जेम्स छुट्टिए । यसरी छुट्टिएको केही समयपछि फोटोग्राफरको आँखामा परेपछि मर्लिन मोडलिङ हुँदै फिल्ममा प्रवेश गरेकी थिइन् ।  

त्यसपछिको समयमा थप दुई विवाह समेत गरेकी मर्लिन बच्चा खेर गएपछि नशाको लतमा फसिन् । नशा बढी भएपछि जगमगाउँदो फिल्म करिअर र जीवनबाट उनले बिदा लिएकी थिइन् । यसलाई नै नेटफ्लिक्सले ‘ब्लोन्ड’ मा देखाउदै छ।